Bartsch to Müller, 19/29 June 1631
Jacob Bartsch, “Bartsch to Müller, 19/29 June 1631,” Nova Kepleriana 4, June 29, 1631, 104–105, transcribed in Plain Old Text, https://sources.vjbe.net/stable/6476h.
Nova Kepleriana 4 29 Jun, 1631, p. 104–105 Summary
Part of Die Keplerbriefe auf der Nationalbibliothek und auf der Sternwarte in Paris
Bartsch, forced 'from the stars to the rakes', writes of Kepler's widow and children now at Lauban, his logarithmic tables, the price of the *Ephemerides*, and the poems on Kepler's death.
Source: Jacob Bartsch's letter to Philipp Müller written at Lauban on 19/29 June 1631, after Kepler's widow and children had moved there from Sagan: on the journey still to be made to Regensburg, Linz and Vienna, his logarithmic tables, the price of the Ephemerides, Müller's gift to his son, and the funeral poems for Kepler. The original is in the Bibliothèque de l'Observatoire, Paris (B, 1, 9; 89, 10. H. 9). Printed in extracts in Nova Kepleriana 4, ed. Walther von Dyck and Max Caspar, Abhandlungen der Bayerischen Akademie der Wissenschaften, Math.-naturw. Abteilung 31, no. 1 (Munich, 1927), 104–105.
Transcribed from: the page images of the 1927 printing.
Only the Latin is given; the editors’ German summary and notes are left out. The 1927 edition prints only extracts. Each paragraph below is one of its extracts, and the omission marks (…) are the editors’. Spaced type, which the editors used for emphasis, is given in italics.
Sal. plur. et off. perpet. etc.
Quod plaerisque hoc turbato et inverso rerum omnium, publicarum, privatarum, magnarum, parvarum statu accidit, ut vel ab honoribus ad onera, vel a Musis ad nugas, vel ab otio ad negotium, vel a libris ad liberos, vel ab astris ad rastra transire cogantur: id mihi quoque, si non simul et semel contigit, saltem posthac contingere videtur. Ecce enim, dum otium pro Urania mea apud meos sector, negotium apud Kepplerianos in dies ingravescit, non tam librorum, quam liberorum caussa; siquidem sublatis jam operis omnibus typographicis, Sagano Laubam cum liberis et ancilla adduxi socrum, ubi per aliquod tempus subsistet, ut dispositis ad iter rebus mecum vel sola, vel cum liberis Ratisponam eat, haereditatis dividendae caussa, exinde abeundum erit et Lincium et Viennam: Faxit Deus, ut meliori successu, feliciori fato. Alias quomodo rastra jam cum astris speculari, vel astra numerare inter rastra non verear, coram exponet frater. Dubia enim ista tempora et varia varios mores, studia dubia requirunt. Haec de meo statu praesenti; publicum periculosissimum melius nosti.
Jam ad tuas breviter: Logarithmorum negotium quod attinet, id sane sua habet dispendia, plura tamen meo judicio compendia. Transmutatio arcuum molesta ex tabulis non dilatatis. Non tamen desinam omnes istas excerptionis molestias vel tollere vel sublevare. Logarithmos indicis meos exactissimos comprobat non tam series differentiarum lateralium exacta, quam calculus singulorum, tribus adhuc numeris ibi resectis auctus. …
Pretium Ephemeridum apud vestrates Bibliopolas constitutum maxime demiror. Heu iniquum lucrum! A Tampachianis haeredibus infra 3 Joachimicos non vendetur; quapropter hoc pretio amicis ea quae tecum habes exemplaria meo arbitrio vendere poteris, ita tamen, ut ipsi hac de re taceant, ne et sibi et nobis creent molestias.
De altero tomo Ephemeridum aliisque alio tempore. Consilium tamen Exc. T. non displicet, praesertim si hisce in locis subsistere cogerer, aut Imperator ad edendas Observationes aliquid suppeditaret.
Munus filiolo nostro, Dei beneficio bene valenti, tramissum aureum argenteumque ut recusare aut remittere nefas putamus, ita pro eo maximas interim gratias agimus et habemus, donec Deo volente et benedicente ad tuum nostrumque votum bene crescat, et olim debitas gratias referre possit ipse.
Exemplar Somnii in charta mundiori cum reliquis a fratre accipies. …
Pro tramissis epicediis interim ex me gratias authoribus; plura olim conjuncta edentur. Tuum si fieri potest, non omittas. Dn. Ursinus Francofurti in publica magistrali promotione, parentali ovatione memoriam beatam Keppleri celebravit. Descriptam quam primum mittet. Novi si quid habes certi, aut solatii, fratri communices, eumque eodem respondeas quaeso. Jam a me et mea, nostroque salve officiosissime cum Tua et fave nobis.